មីយ៉ាន់ម៉ា៖ អគ្គីជ័យកីឡា និងភ្លើងគប់ បានទៅដល់ប្រទេសទីក្រុងយ៉ាំងហ្គូន ប្រទេសមីយ៉ាន់ម៉ានៅព្រឹកថ្ងៃទី១៩ ខែមេសា ឆ្នាំ២០២៣។ ភ្លើងគប់នេះនឹងត្រូវដង្ហែនៅថ្ងៃទី២១ ខែមេសា ឆ្នាំ២០២៣ខាងមុខនេះ។

ប្រទេសមីយ៉ាន់ម៉ា គឺជាប្រទេសទី៨ បន្ទាប់ពីដង្ហែរួចរាល់ចេញពីប្រទេសថៃ សិង្ហបុរី ម៉ាឡេស៊ី ទីម័រខាងកើត ឥណ្ឌូណេស៊ី ហ្វីលីពីន និងវៀតណាម។ ភ្លើងគប់នេះនឹងបន្តដង្ហែទៅប្រទេសឡាវ ដែលជាប្រទេសចុងក្រោយក្នុងអាស៊ាន មុនត្រឡប់មកកម្ពុជាវិញដោយឆ្លងកាត់ខេត្តជុំវិញបឹងទន្លេសាប។

គូសបញ្ជាក់ថា ភ្លើងគប់កីឡានឹងដង្ហែចេញពីប្រទេសឡាវ ឆ្ពោះមកកម្ពុជាវិញតាមខេត្តស្ទឹងត្រែង នៅថ្ងៃទី២៧ ខែមេសា ឆ្នាំ២០២៣ ដើម្បីបន្តដង្ហែនៅតាមខេត្តជាប់បឹងទន្លេសាប ដោយដង្ហែចេញពីខេត្តស្ទឹងត្រែង ឆ្ពោះទៅខេត្តក្រចេះនៅថ្ងៃទី២៨ ខែមេសា បន្តទៅខេត្តកំពង់ឆ្នាំងនៅថ្ងៃទី២៩ មេសា និងបន្តមកខេត្តជុំវិញបឹងទន្លេសាបដទៃទៀត ចុងក្រោយនឹងបន្តដង្ហែមកទីលានពហុកីឡដ្ឋានជាតិមរតកតេជោដែលជាកន្លែងបើកពិធីប្រកួតស៊ីហ្គេម និងប៉ារ៉ាហ្គេមនៅថ្ងៃទី០៥ ខែឧសភា ឆ្នាំ២០២៣៕